Psalms 40
Kaem nu anananga Saonga Yawara ko den
(Devit ko wur bo)
1Ani Kari Biya aga sangukko ko kutekute maem ale kimi bita lagerem,se nu dogowa gurugam ale aninga aira ikiam.
2Ani mutim yu lom pupurut aga lakumokko mu ningi bagerem, se nu aga sangaru tam,
ale sor garagarayam mu te aga beteram ale sokel aisam.
3Ale nu wur iru aga kausam se ani ilusam,
mu wur anananga Kaem nup te patowara ko ware ilusam.
Imikiri munan imi aringimon ko ikimon ale, nguangomon ale Kari Biya ko nongomang ningi nunguning arukko.
4Kariimet Kari Biya ko nongomang ningi nunguning aram, se kaem kawel me karo tuikasan, ale kaem kawel me nunup patawukasan, mu amilmilomonko!
5O Kari Biya, anananga Kaem, ni anananga sangaruko kilek bibiya sokel ago beterem.
Kari bo ta nika tuar mena.
Ni ana nago ko kilek suen biya beterem, nunga tom kalel biya nunguningkiri, se ani nunga balu sapirikko me terong.
6Ni ana tama bita kisinakko mu ko me kuesam,
sipsip meme mel alta te kai sapasan mu me ko kuesam,
ale nanga memek te siwurokko tama bita kisisan mu ni me ko kuesam tala. Mena.
Mu ni adogowa nika kiring te ikiekko mu aisem.
7Se ani balem, “Ani ni kiring karo tuekko tairem iweya.
Nika batoga te ani ago ko iwitata balem se aniso.
8O aninga Kaem, ani nika gemang karo tuekko ninguru kuesam!
Nika munan den mu aninga angamang motam ningi aniso.”
9O Kari Biya, ni ikisam, ani biguwura biya ningi agiring me kutek masam, am tom suen biya nika munan diram mu ko nunga manaru lagasam.
10Nika dugu duap ani me kaluwusam. Nika munan diram mu ko ani nunga manorsam. Se ni me aga betesam, pempem aga sangorsam mu ko dugu duap ani balu sapasam.
Ani nika kariimet biguwura ningi me kawus masam, nika gemang lila se ka munan nunguning mu ko ani nunga manaru sapasam.
11Kari Biya, ani ikisam, nika gemang lila ani aisuwasam mu me menarukkowo!
Ni me aga bitarko, pempem ka gemang lila te aga sinar toko.
12Ani ikup memek suen biya aga taluru gurugam se ningi bagasam!
Se agata aga memek mu aga ira muram se ani dirmaik loagirikko dolosam.
Aga memek mu suen biya nunguningkiri, ale aninga amane gawa asupuling te mu kiaram.
Se ani angamang ningi sokel mena se nguangasam.
13O Kari Biya, aga sangaruko!
Aitakta imi aga sangaruko!
14Se kariimet aninga momonko negawasan mu dolmon ale magimonko,
ale arikaya ani memek te namirikko nongomang aniso, mu ni aninga sangaru se dolora nunga morukko,
15ale arikaya aninga gusirsan mu ninguru dolomon ale magi kutuwumonko!
16Bare kariimet nika nip patowasan mu amilmil nungate tairuk se biyala amilmilomonko,
kariimet ni nunga sangem se ko ko amilmilasan, mu tom suen biya amilmil kisimon ale balmon, “Kari Biya mu am gira nunguningkiri bagoso,” ma balmonko.
17O Kari Biya, ani kituwura, asokel mena,
ni ani ago ko me kamili sapurukko!
Ni aninga Sangaru Ta Kari, se aga Kaem.
Tairate tair ale aga sangaruko!
Copyright information for
WSK